श्री शिराम साकोसको १३औं वार्षिक साधारण सभा सम्पन्न

काठमाडौं । तारकेश्वर नगरपालिकामा रहेको श्री शिराम बचत तथा ऋण सहकारी संस्थाको १३औं वार्षिक साधारण सभा सम्पन्न भएको छ ।

संस्थाका कार्यवाहक अध्यक्ष कृष्ण बहादुर रिमालको सभापतित्वमा आयोजित सभा मंसिर ६ गते सम्पन्न भएको हो ।

सहकारी हकहित राष्ट्रिय समाजका अध्यक्ष गोविन्द गिरीको प्रमुख आतिथ्यमा सम्पन्न उद्घाटन सत्रमा स्थानीय समाजसेवी गंगा प्रसाद शर्मा, कानुनी सल्लाहकार मुक्तिनाथ आचार्य, संचारकर्मी रामशरण न्यौपाने लगायत विभिन्न संघ संस्थाका प्रतिनिधि अतिथि रहेका थिए ।

साधारण सभामा संचालक समितिको तर्फबाट कार्यवाहक अध्यक्ष रिमालले आर्थिक वर्ष (आ.व.) २०८१/८२ को वार्षिक प्रतिवेदन र  कोषाध्यक्ष अम्मर कोईरालाले आर्थिक प्रतिवेदन पेश गरे ।

प्रतिवेदन अनुसार गत असार मसान्त सम्ममा संस्थाको शेयर पुँजी ८५ लाख ५६ हजार रुपैयाँ, बचत संकलन १ करोड ६९ लाख रुपैयाँ र ऋण लगानी १ करोड २३ लाख ८९ हजार रुपैयाँ कायम भएको छ । साथै जगेष कोषमा १ लाख २२ हजार रुपैयाँ संचिति रहेको छ ।

साधारण सभाले संस्थाको संचालक समितिमा रिक्त रहेको अध्यक्ष पदमा तत्कालीन उपाध्यक्ष कृष्ण बहादुर रिमाललाई चयन गरेको छ । साथै उपाध्यक्षको रिक्त पदमा सुजन खतिवडालाई चयन गरेको छ । संचालक समितिको चार वर्षे कार्यकाल व्यतीत् हुन अब एक वर्षमात्र बाँकी रहेको छ ।

संस्थाका सचिव अर्जुन प्रसाद रिमालले संचालन गरेको कार्यक्रममा उपस्थित अतिथि तथा सहभागीलाई संस्थाकी कर्मचारी सुमित्रा पाण्डेले स्वागत गरेकी थिईन ।

साधारण सभाको अवसर पारेर संस्थाले शेयर सदस्यहरु मध्येबाट राम बहादुर कुँवर र धन कुमारी कुँवरलाई उत्कृष्ट बचतकर्ता र भरत खकुरेललाई उत्कृष्ट ऋणीको रुपमा सम्मान गरेको छ । साथै एक जना उत्कृष्ट कर्मचारीलाई पुरस्कृत गरेको छ ।