बूढानीलकण्ठमा नगर प्रमुख अधिकारीको नेतृत्वमा सहकारी दिवस सम्पन्न
काठमाडौं । बूढानीलकण्ठ नगरपालिका भित्रका सहकारीकर्मीहरुले नगर प्रमुख मिठाराम अधिकारीको नेतृत्वमा ६८औं राष्ट्रिय सहकारी दिवस भव्यरुपमा मनाएका छन् ।
सहकारी दिवसको अवसरमा नगरभित्रका सहकारीले चैत्र २० गते नगर प्रमुख अधिकारीको नेतृत्वमा वडा नं. ८ को गोल्फुटार बास्केटबल कोर्टबाट प्रभातफेरि निकालेका थिए ।
साँस्कृतिक बाजागाजा र झाँकी सहित निकालिएको प्रभातफेरि नगरपालिकाको सभाहलमा पुगेर सभामा परिणत भएको थियो ।
सभालाई सम्बोधन गर्दै नगर प्रमुख अधिकारीले सहकारीको ऋण नतिर्ने ऋणीलाई लक्षित गर्दै नगरका सबै सहकारी संस्थाहरुलाई सिस्नोको विरुवा वितरण गर्ने बताए ।
कार्यक्रममा बोल्दै उनले सहकारी संस्थाको ऋण नतिर्ने ऋणीलाई सिस्नो पानी लगाउन सो बनस्पतीको बिरुवा वितरण गर्ने बताएका हुन् ।
नगरप्रमुख अधिकारीले आगामी दिनमा नगरपालिकाले सिस्नोको विरुवा सहितको गमला वितरण गर्नुका साथै एउटा गाडीको ब्यवस्था गरेर ऋण लाने र नतिर्नेहरुको नाम टासेर नगर परिक्रमा समेत गर्ने भन्दै खराब ऋणीलाई ब्यङ्ग्य प्रहार गरेका छन् ।
नगरभित्रका सहकारी संस्थामा कुनै समस्या परेको खण्डमा आफुलाई सिधै भन्न आग्रह गर्दै प्रमुख अधिकारीले सकेसम्म संचालकका आफन्त तथा नजिककालाई ऋण प्रवाह नगर्न सचेत समेत गराएका थिए ।
नगर प्रमुख अधिकारीले सभापतित्व गर्नुभएको कार्यक्रममा नगर उप–प्रमुख अनिता लामा, नगर प्रवक्ता नवराज भट्टराई, प्रमुख प्रशासकीय अधिकृत अजय बर्तौला सहित विभिन्न वडाका अध्यक्षहरु, कार्यपालिका सदस्यहरु तथा नगर सहकारी समन्वय समितिका पदाधिकारी तथा सदस्यहरुको उपस्थिति रहेको थियो ।
कार्यक्रममा सहकारी हकहित राष्ट्रिय समाजका अध्यक्ष गोविन्द गिरी लगायत नगरका विभिन्न सहकारी संस्थाका प्रतिनिधिहरुको बाक्लो उपस्थिति रहेको थियो ।
नगरपालिका सहकारी शाखा प्रमुख अच्युत खड्काले संचालन गर्नुभएको सो कार्यक्रममा शाखाले नियमित रुपमा प्रकासन गर्दै आएको पुस्तिका सहकारी दर्पण बिमोचन गरिएको थियो ।
नगर स्तरीय सहकारी समन्वय समितिका अध्यक्ष बेदुकाजी घिमिरेले स्वागत मन्तव्य राखेको कार्यक्रममा समन्वय समितिका पदाधिकारी तथा सदस्यहरुलाई प्रमाणपत्र पनि वितरण गरिएको थियो ।
